جێگری دەزگای دادوەریی ڕێژیم: یاسای تاوانی سیاسی بە فەرمی ناناسم

كوردستان میدیا: لە كاتێكدا كە فەرمیبوونی یاسای "تاوانی سیاسی" ڕۆژی یەكشەممە لە لایەن حەسەن ڕۆحانی، سەركۆماری ڕێژیمەوە ڕاگەیەندرابوو، جێگری فەرهەنگیی دەزگای دادوەری دەڵێ: "من شتێك بە ناوی یاسای تاوانی سیاسی بە فەرمی ناناسم".
ئاخوند هادی سادقی، ڕۆژی دووشەممە ١٧ی جۆزەردان لە وتووێژێكدا لەگەڵ ڕۆژنامەی "شرق" دانی بەو ڕاستییەدا نا كە بیانووی ئەو سەركوتانەی كە دژ بە چالاكانی سیاسی كراوە، هەمیشە تۆمەتی ئەمنیەتی بووە، نەك چالاكیی سیاسی".
ئەو بەرپرسەی ڕێژیم ئەوەشی زیاد كرد كە: "بۆ نموونە كەسێك بە ڕواڵەت تۆڕێك بۆ كاری سیاسی پێك دەهێنی، بەڵام دەزگا ئەمنیەتییەكان بۆیان دەردەكەوێت كە لە پشتی پەردەوە تۆڕێكە بۆ پێوەندیگرتن بە دوژمنەوە".

حەسەن ڕۆحانی، سەركۆماری ڕێژیم ڕۆژی ١٦ی جۆزەردان "یاسای تاوانی سیاسی"ی بۆ جێبەجێكردن بە دوو وەزارەتخانەی نێوخۆ و دادگوستەری ڕاگەیاند.

بەپێی پەسەندكراوی مەجلیسی ڕێژیم، ئەو تاوانانەی كە "بە ئامانجی چاكسازی لە كاروباری وڵاتدا بەرانبەر بە بەڕێوەبەران و دامەزراوە سیاسییەكان یان سیاسەتی نێوخۆ یان دەرەوەی وڵات ئەنجام دەدرێن، بە بێ ئەوەی كە مەبەستیان زەبروەشاندن لە ئەسڵی نیزام بێت، بە تاوانی سیاسی دەژمێردرێن".

سەرەڕای ئەوە، بە گوێرەی ئەو یاسایە، كردەوەكانی وەك "هاندانی خەڵك بۆ پارچەكردنی وڵات، شەڕ و كوشتار و تێكهەڵچوون" و "ئاشكراكردنی نهێنییەكان" بە تاوانی سیاسی لە قەڵەم نادرێن.

لەو یاسایەدا سووكایەتی بە بەرپرسانی ڕێژیم، بڵاوكردنەوەی "درۆ و دەلەسە" و تاوانە دیاریكراوەكانی نێو یاساكانی هەڵبژاردن وەكوو چەند نموونەیەك لە تاوانە سیاسییەكان پێناسە كراون.

ئەو یاسایە هەروەها هێندێك "پوان" بۆ بەندكراوانی سیاسی دیاری دەكات، بۆ نموونە: "جیاكردنەوەی شوێنی ڕاگرتنیان لە شوێنی تاوانبارە ئاساییەكان لە ماوەی دەستبەسەربوون و بەندكراندا"، "قەدەغەبوونی دەستبەسەركران و بەندكران بە شێوەی تاكەكەسی بۆ ماوەی زیاتر لە ١٥ ڕۆژ"، "قەدەغەبوونی لەبەركردنی جلوبەرگی زیندان لە ماوەی دەستبەسەربووندا" و "قەدەغەبوونی گەڕاندنەوەی تاوانبارە سیاسییەكان".